Сезон 2024-2025 завяршыўся.

Час падвесці яго вынікі.

Пачнем з пачаткоўцаў. Сёлета ў нас з'явіліся некалькі хлопцаў, на мой погляд вельмі перспектыўных, якія сябе нядрэнна праявілі на турнірах. Іван Гілевіч, Вадзім Пасылкін, Станіслаў Белых, Іван Шачок.

Наведвалі турніры не часта, але па іх гульні зразумела, што цікавасць у засваенні ёсць, рукі і галава ва ўсіх працуюць у добрым тандэме. Хочацца пажадаць ім усім не спыняцца, асвойваць прыёмы, а вынік не прымусіць сябе доўга чакаць. У вас усё ёсць, каб дамагчыся поспехаў!

На жаль, гэты сезон прайшоў міма Андрэя Князюка і Леаніда Лысенкі. Калі Леанід змог аднойчы прыехаць на турнір, то Андрэй так і не сабраўся з сіламі і жаданнем. Не атрымліваецца ў нашых ветэранаў з-за адлегласці, бытавых і сямейных пытанняў прыязджаць здалёк. Шчыра шкада!!

Усяго толькі па разу паўдзельнічалі ў турнірах Андрэй Хапроў, Іван Авін і Віталь Собаль - усе яны цікавыя і вопытныя гульцы, з якімі заўсёды можна атрымаць непрадказальныя вынікі. Спадзяемся, што будзем бачыць іх часцей!

Парадаваў вяртаннем да ўдзелу ў турнірах Уладзімір Чарнабай.

Дзякуючы яму і тата Міхаіл пачаў часцей іх наведваць. Свой педагагічны бацькоўскі эфект выдатна праяўляе Уладзімір Сліж, яго дачка Аня гуляе з намі на пастаяннай аснове не прапускаючы ні воднага турніру! Думаецца мне, што расце будучая чэмпіёнка краіны... А можа і свету!

Давайце пяройдзем да тых, хто гуляў пастаянна.

Нагадаю, што ў сезоне 10 турніраў. Для разліку рэйтынгавых ачкоў мы ўлічваем суму вынікаў лепшых 6-ці турніраў.

Усе вышэйпералічаныя пачаткоўцы, на жаль, у гэтым сезоне не набралі неабходную колькасць наведванняў, таму іх гульню мы не можам ацэньваць у лічбах. Хоць бясспрэчна, згуляныя імі турніры даюць пэўнае разуменне і высновы.

Уладзіміру Чарнабаю не хапіла аднаго турніру да разліку рэйтынгу. Але яму цалкам можна прысудзіць месца сярод нас усіх, таму што так увайсці ў гульню пасля чатырох гадоў паўзы, наведваючы турніры не толькі ў нас, але і за мяжой, яшчэ і зарабляючы прызы, - гэта годна павагі! 

14 месца (332 ачкі) сярод пастаянных удзельнікаў па праву можна і трэба аддаць Вове.

13 месца (437 ачкоў) - Ганна Сліж. 

Аня малайчына, не прапусціла ні воднага турніру! Яе сталасць, цярпенне і ўседлівасць, якія выяўляюцца ў такім зусім юным узросце, дарагога каштуюць. З чарговым сезонам будуць прыходзіць і разуменне гульні і вынікі. Хочацца пажадаць толькі ўдачы і поспеху!

12 месца (887 ачкоў) - Віталь Куратнік.

Віталь безумоўна дасягнуў апагею ў авалоданні навыкам пасу на правага нападніка і забіваннем ім гола ў далёкі кут. Такога не ўбачыш больш ні ў аднаго гульца не толькі Беларусі, але і свету. Калі б яшчэ тое ж пачаць тварыць злева, Віталь бы стаў проста непераможным! 

11 месца (1506 ачкоў) - Міхаіл Чарнабай.

Міша мае ў сваім арсенале выдатныя элементы: выхад і какос, якія яму выдатна дапамагаюць у нападзе, але якія ён рэдка выкарыстоўвае. Гэты сезон можна аднесці яму ў залік і сказаць вялікі дзякуй за сына і яго вяртанне ва ўлонне царквы.

10 месца (1536 ачкоў) - Аляксандр Шыркавец.

У гэтым сезоне Аляксандр выдатна здзівіў сваімі праходамі ў плэй-оф і перамогамі там над некаторымі гульцамі. Яго непадатлівасць і шанцаванне часцяком ратавалі і дазвалялі заканчваць матчы пераможцам.

9 месца (1554 ачкі) - Аляксандр Авін.

У гэтым сезоне Аляксандру, нават па яго ўласных словах, не шанцавала. Амаль на кожным турніры не хапала зусім няшмат, каб праскочыць крыху далей. Але поспех усё ж у сезоне ў Аляксандра быў - ён стаў пераможцам у камандным турніры і там як раз Аляксандр паказаў сябе вельмі добра!

8 месца (1669 ачкоў) - Вадзім Крыніцкі.

Вадзім змог прайсці кворум па турнірах, згуляўшы менавіта 6 за сезон, магчыма, гэта перашкодзіла яму быць вышэй у выніковай табліцы. Далей за 1 раўнд плэй-оф сёлета яму не ўдалося прайсці. Чакаем ад яго больш стабільнага наведвання і яркай упэўненай гульні ў наступным сезоне!

7 месца (1793 ачкоў) - Аляксей Краўчанка.

У гэтым сезоне ў Лёшы атрымлівалася значна больш, чым у мінулым. Пастаянныя трапленні ў плэй-оф, яркія перамогі ў вырашальных матчах, прызавое 3-е месца на 4-ым этапе. Нельга таксама не ўспомніць паездкі да нашых расійскіх сяброў і ўдалыя выступы там. Сезон можна аднесці сабе ў залік!

6 месца (1818 ачкоў) - Андрэй Акінфін.

Андрэй заўсёды славіўся сваёй хуткай гульнёй. Гэты год быў стабільней па гульні, крыху не хапала на завяршальных стадыях. У гэтым сезоне ён аднойчы браў бронзу і двойчы спыняўся за крок ад яе.

5 месца (1950 ачкоў) - Уладзімір Сліж.

Адрыў пятага месца ад шостага па ачках даволі вялікі. У Валодзі ў скарбонцы гэтага сезона 1 золата і 1 бронза. Да фішак Валодзі заўсёды рыхтуешся і ведаеш пра іх, але не заўсёды паспяваеш на іх рэагаваць падчас матчаў. "Мілі", "більярд ад борта"  - каронкі, якія ён ліха і вынікова выконвае лепш за ўсіх астатніх, што і прыносіць яму перамогі, а іншым засмучэнні!

4 месца (1960 ачкоў) - Аляксандр Далгоў.

У яго ўсё ёсць, не хапае аднаго - часу. Горы б звярнуў, будзь яго ў Сашы ў дастатку! Двойчы браў срэбра і бронзу. Тройчы сканчаў на 4 месцы і толькі таму, што сыходзіў з турніру. А калі б гуляў? Адназначна склаў бы канкурэнцыю хлопцам, якія апынуліся вышэй у выніковай табліцы! 

Уласна, да іх і пяройдзем.

3 месца (2121 ачко) - Эдуард Куратнік.

Пачатак сезона ў Эдуарда не пайшоў: першыя этапы па-за прызавой тройкі, а затым гульня наладзілася, і Эдуард не пакідаў турніры без прызавога месца: чатыры разы першы, тройчы другі і аднойчы трэці. Цалкам сабе выдатная гульня і годны вынік!

Але на мой погляд, самая галоўная перамога ў Эдуарда здарылася за межамі нашай краіны, у Расіі. Менавіта там на Чэмпіянаце Расіі ў суперветеранском разрадзе (тым, каму за 55 гадкоў) Эдуард узяў золата, абышоўшы ўсіх гуру, мегадосвідных і наймацнейшых гульцоў краіны-суседкі. Рускія ад такой нечаканасці былі вельмі расчараваныя! Ведай нашых!

2 месца (2136 ачкоў) - Аляксандр Бартош.

Зноў другое месца, як і ў мінулым сезоне. З аднаго боку добра, з другога - не вельмі, таму як былі ў Аляксандра чэмпіёнскія сезоны, да якіх пара б вяртацца. Тройчы за сезон Аляксандр станавіўся першым, аднойчы другім і двойчы трэцім.

1 месца (2146 ачкоў) - як і ў мінулым сезоне Мацвей Шыркавец.

Мацвей двойчы выйграваў этапы, тройчы быў другім, аднойчы трэцім. Шмат матчаў узяў у канцоўках і часцяком вырываў перамогі менавіта тады, калі супернікі адчувалі смак перамогі. Чэмпіёнская гульня, хоць гэты сезон быў узяты на тоненькага.

Многія заўважаць адрыў прызавой Тройкі па ачках ад чацвёртага месца. Уважлівае вока яшчэ і спытае: "Як пры такой колькасці перамог на этапах Эдуард стаў толькі трэцім? Бо на твар відавочная перавага па прызавых месцах над Аляксандрам і Мацвеем!" Адказ крыецца ў дробязях: сістэма шчодра раздае ачкі за BELARUS OPEN. Гульцы, якія добра выступілі там, атрымліваюць значна большую перавагу па ачках перад астатнімі. Менавіта BELARUS OPEN і згуляў злы жарт з Эдуардам. За 14 месца Эдуард зарабіў 375 ачкоў. За 11 месца Аляксандр Бартош атрымаў 402 ачкі, а Мацвей за 8-ае - 426 ачкоў. Без гэтага турніру расклад па прызавых месцах на нашым чэмпіянаце быў бы зусім іншым. Ёсць над чым паразмаўляць у новым сезоне, магчыма, трэба перагледзець падлік рэйтынгу без улічвання выніку выступу нашых гульцоў на BELARUS OPEN...

Яшчэ адна ўзнагарода знайшла свайго героя ў гэтым сезоне. 

Прыз імя Мікалая Крылова - Нязломная Сцяна - за максімальную колькасць згуляных на нуль матчаў у групавых этапах сезона ўручаецца Аляксандру Далгову.

Саша абышоў сваіх праследавацеляў і цалкам заслужана забраў гэты прыз!

Традыцыйна пажадаю, каб кожны з вас у наступным сезоне згуляў лепш папярэдняга!

Настольны хакей выдатны, а гуляць у яго - адно задавальненне!

Чакаем усіх тых, хто мала наведваў турніры, далучайцеся да нас!

Старт наступнага, 13-га па ліку сезона 30 жніўня! Рыхтуйцеся!!