АЧБ #6!

Информация о материале: Категория: Белорусские турниры; Опубликовано: 30 января 2022

АЧБ # 6.

29 студзеня прайшоў чарговы этап, шосты па ліку. Кожны турнір падае сюрпрызы, на гэты раз яны таксама былі.

Адзіны, хто з нашай абоймы трымаўся і не падхапіў каранавірус, - гэта Андрэй Князюк. Але да гэтага турніру накрыла і яго. Балазе пераносіць пакуль што нармальна.

А ўсе астатнія прыйшлі. Дружына з 15-ці чалавек апынулася вельмі баявой і ў гульнявым зале сёння было горача.

Ёсць у кавіда і плюсы. У некаторых перахварэлых назіраецца павелічэнне вынослівасці, вырастае паказчык дакладнасці кідкоў, паляпшаюцца хуткасць і шпаркасць рухальнай рэакцыі. Усё гэта пра аднаго з герояў сённяшняга АЧБ-Леаніда Лысенка. Доўга выходзіў з хваробы, цяжкавата яна яму далася, але ў гульні прагрэс на твар. Ды і целам наш герой маладзейшы стаў)

Аб усім па парадку.

15 байцоў гулялі у 2 кругі.

Менавіта тут і варта расказаць пра цуд-гульню нашага Леаніда. Пад яго жорны трапілі: двойчы Віталь Собаль, Мацвей Шыркавец, Аляксандр Далгоў, па разе былі зрынутыя: Андрэй Акінфін, Аляксей Краўчанка, Міхаіл Чарнабай, Вадзім Крыніцкі. Таксама шмат нічыйных вынікаў з моцнымі супернікамі. Як вынік-трэцяе месца ў чэмпіянаце з 37-ю ачкамі ў актыве пасля 28 тураў. Гэта лепшы вынік Леаніда за ўсю гісторыю выступленняў. Са слоў Лёні, ён за 3 месяцы ні разу не гуляў... А атрымалася, як у Гая Юлія Цэзара: VENI,VIDI, VICI...

Другім стаў Мацвей Шыркавец, у яго 40, ну а першым (і для яго гэта таксама ўпершыню ў чэмпіянаце) стаў Уладзімір Сліж (43 ачкі), якому, як ён сказаў, дапамагла шчаслівая шайба, выдадзеная Аляксандрам Бартошам перад пачаткам турніру. Гуляў ён толькі ёй, пёрла невымоўна).

А вось у Аляксандра Бартоша справы былі не вельмі - толькі 8-ае месца па выніку чэмпіянату. Мабыць, усю сваю ўдачу ўклаў у шайбу для Валодзі, сабе не засталося... Нядрэнна згуляў Віталь Собаль, стаўшы шостым. Яго сын Назар ствараў праблемы тым, хто думаў, што гульні з маладым нахокерам будуць для іх прагулкай. Па выніку перад ім капітулявалі такія знакамітыя супернікі, як Аляксандр Авін, Аляксей Краўчанка, Леанід Лысенка і нават Мацвей Шыркавец! З многімі гульцамі звёў матчы ўнічыю.

Малайчына Назар, адчуваецца, што трэніроўкі з бацькам робяць сваю справу для абодвух. Яшчэ б абодвум часцей наведваць турніры!!

Першая ліга сёння была незвычайна шматлюднай: за медалі трэба было пазмагацца спачатку ў кругавым турніры, потым у плэй оф.

Па выніку кругавога турніру ўтварыліся пары плэй оф: Вадзім Крыніцкі з першага месца выйшаў на Аляксея Краўчанку, які заняў чацвёртую пазіцыю, а Віталь Куратнік з другога месца трапіў на Аляксандра Шыркаўца. Гулялі да дзвюх перамог. Вадзім з мінімальнай перавагай у вырашальнай партыі прайшоў Аляксея, а Віталь у дзвюх партыях перамог Аляксандра.

Тыя, хто прайграў, біліся за бронзу, дзе больш пашанцавала Аляксандру, у авертайме вырашальнай партыі зноў Аляксею непадфарціла.

Ну а пераможцам заслужана стаў Вадзім Крыніцкі, у дзвюх партыях адолеўшы Віталя Куратніка з яго шматхадовымі атакуючымі камбінацыямі.

Плэй оф вышэйшай лігі адразу паказаў, што выйграть вельмі хочуць усе. З чатырох пар у дзвух усё вырашылася толькі ў сёмай партыі.

Першая пара: Уладзімір Сліж-Аляксандр Бартош. У першай жа партыі Аляксандр павёў 3 шайбы, але на працягу апошняй хвіліны Уладзімір забівае 3 і пераводзіць гульню ў авертайм, дзе забівае пераможную. Зноў шчаслівая шайба?!

Другая партыя, зноў авертайм, і зноў Уладзімір на куражы яго выйграе. Прыйшлося Аляксандру ў таямніцы ад Уладзіміра рабіць ракіроўку шайбамі, таму нішто іншае, больш-менш разумнае, сёння не працавала. Можна доўга смяяцца... Але ў серыі перамог Аляксандр - 4:2. Удачу даў - удачу забраў!

Гульня ў парах Эдуард Куратнік-Андрэй Акінфін і Мацвей Шыркавец-Аляксандр Далгоў развівалася па аднолькавым сцэнары: ніхто не адпускаў іншага больш, чым на адну партыю. Пры такіх арэлях ўсё вырашыла сёмая партыя. Эдуард і Мацвей прайшлі далей.

У чацвёртай пары была інтрыга паболей усіх астатніх: усе чакалі працягу Боскай гульні Леаніда Лысенкі супраць Віталя Собаля, якога ў чэмпіянаце ён ужо двойчы адолеў. Але Віталь сабраўся і аддаў Леаніду ўсяго толькі адну партыю.

Пераможаныя разыгрывалі паміж сабой 5-8 месцы. На жаль, як гэта часам бывае, без Аляксандра Далгова. Вынікі на фота:

Варта адзначыць, што для Віталя Собаля трапленне ў паўфінал вышэйшай лігі турніру - таксама лепшае дасягненне за гісторыю яго выступленняў. Віталь таксама прапусціў папярэднія 2 турніры і таксама ліха, як і Леанід Лысенка, накідваў сёння ў браму ўсім, каму непападзя. Цяпер яму трэба было абыграць чэмпіёна мінулага сезону-Мацвея Шыркаўца. Калі пасля пяці партый быў лік 3:2 на карысць Мацвея, была нейкая надзея ў гледачоў: а ці не створыць Віталь сёння сенсацыю? На жаль для Віталя у шостай партыі ўдача была на баку Мацвея.

У другой паўфінальнай пары Эдуард Куратнік капітуляваў перад Аляксандрам Бартошам з лікам 2:4.

Віталь мог яшчэ ўзяць першы для сябе кубак, але ў матчы за 3 месца саступіў Эдуарду. Шкада, перамога для Віталя магла быць вішанькай на торце...

Фінал паміж чэмпіёнам і віцэ-чэмпіёнам мінулага сезону абяцаў быць гарачым. Ён такім і быў. Напружанне, сабранасць, уважлівасць, авертаймы (а куды без іх у такіх матчах). І пры гэтым мінімум эмоцый, хоць часцяком матчы паміж імі вельмі эмацыйныя.